Timersoqatigiiffik S.A.K. ukioq manna ukiunik 70-nik  ukioqalerluni nalliuttorsiorpoq.

S.A.K pilersikkiartuaarneqarpoq peqatigiiffinnik pingasunik. Siullermik timersoqatigiiffiit marluiusimagaluarput ukuullutik: Amerloq Kunuk-lu. S-ertaalu inuusuttut peqatigiiffigisimasaannit “Siumut”-mit pivoq. Siumut timersoqatigiiffiunngikkaluarpoq, peqatigiiffiullunili siunertaqarlutik inuusuttut ulluinnarni inuunissaannik, sunngiffimmilu aliikkutassaqartinneqarnissaq siunertaasimalluni.

Siumullu pisoqaanersaralugu 1926-miugunartoq aallarnerneqarsimalluni. Amerloq 15. maj 1943 aallarnerneqarsimavoq. Kunuk aallarnerneqarsimalluni 23. april 1945.

1950-p ingerlanerani qallunaat nunaanninngaanniit angalaartitaq tikissimavoq, qaammarsaanerup tungaatigut suliniutilik.

Taassuma arsaattartut Amerloq Kunuk-lu siunnersorsimavai aningaasat tungaatigut iluarnerussammat kattuteqqullugit. 1950 naalersoq december-ip 12-ani udvalge taanna aalijangersimavoq peqatigiiffissaq ateqassasoq S.A.K., isumaqarlunilu: Siumut, Amerloq, Kunuk.

Kingornalu 1951-mi januarip aallaqqaataani suaarutigineqarsimalluni.

S.A.K aallartimmalli timersuutit makkua ingerlanneqarsimapput:

• Arpanneq 100 meter.
• Arpanneq 400 meter.
• Arpanneq 1000 meter.
• Eqaarsaarneq.
• Naaligarneq.
• Qummut pissinneq.
• Kuglerneq.
• Isikkamik arsaanneq.
• Ujakkaarneq.
• Tinngallattaarneq.
• Tilluunneq.

Saniatigut sunngiffimmi aliikkutassat tigummineqarsimapput soorlu qititsitsineq filmertitsinerlu. Ukiumilu aamma sisorartoqartarsimalluni ujakkaartartoqartarluni tinngallattaartoqartarlunilu.

1940-50-ikkullu ingerlaneranni tilluunneq aamma ingerlanneqarsimagaluarpoq. S.A.K-p siulittaasorisimasaasa ilaat Peter Lennert (Piitarsuaq) Atuagalliutinut SAK ukiuni 30-inngortorsiunneranut tunngatillugu oqarpoq: “Eqqaamavara meeraalluta Amerlup kælderianissimasut tilluuterpassuit.”.

S.A.K 2021-mi makku ingerlanneruvai: Assammik arsarneq, Isikkamik arsarnet, Futsal aammalu paaminneq.